Diapositivas a clareo*, Dores Tembrás, 2010 Para miña nai              I                              A elegancia é un corpo                              unha forma de ser desde a pel para o vento                                   Miguel Anxo Fernán Vello encarnación dos versos por ela remitida a ti propia entre vapores de la ramaxe de liño seco o gume da que vén inhalas              II co primeiro raio muselina de hidróxido metamorfose da burbulla en miñoca saia enlamada por herdanza na inclinación dorsal que te bota do rego              III nai calamidades a contramán no peto descosido do mandil cal vivo ou roupa a clareo porque había de reparar eu? baixo a blusa como aguillóns vértebras              IV sen beleza de tísica na herba estendes os lenzos así clareas os días horas de mandil engraxado fosilizando o tisne do peito mentres te miro xenuflexión de lixivia escorrentando dos días o ferro              V modificas a traxectoria pasándolle a pedra á fouciña e alí cinguida de fracaso no medio do camiño sóbesme ao colo para que unha das dúas non se ortigue              VI fe arquitectura de canaveiras para xudías hostís eu deitaba clorofila nas túas mans entre os sapos plataforma lunar guiándome invisíbel              VII enfaixar a renuncia cada mañá para o frío antes do almorzo combater a prosperidade para que non te sorprenda __ * O 12 de marzo de 2010 tivo lugar en Vigo un recital organizado por María do Carme Kruckenberg, no día da muller traballadora. Con tal motivo editouse unha pequena antoloxía titulada elas. el, con poemas da propia María do Carme Kruckenberg, Lino Braxe, Pili Pallarés e os cinco primeiros textos do conxunto que aquí se publica baixo o título de Diapositivas a clareo. Os últimos dous poemas foron incluidos no ano 2011 na antoloxía feminista editada pola Assembleia de Mulheres do Condado: Mulheres entre poesia e luita.